連登網民憶20年前母親送冷衫到學校　今母親患癌自己送褸到醫院　網民感動到喊

不知道大家覺得母親對你做過最窩心的事是甚麼，近日有網民在連登討論區出文分享自己與母親20年前的一段往事，到近日再因為母親的一句說話而嚎哭。不少網民都表示「睇到眼濕濕」，齊留言為事主打氣。

以下為連登網民「中野4葉」帖文：

「6歲時我一年班，冬天嗰陣有一次因為曳被老師罰企一個禮拜，早會同小息都要企特別隊，等全校都知我係曳學生。

所以開始罰嗰朝我扭計唔肯返學，呀媽同我講『做錯事就要承擔後果，你乖乖哋罰完之後就唔好咁曳』我被阿媽送咗上校巴，返到學就喊住咁企特別隊。

可能係我扭計攪到有啲混亂，我上咗校巴之後，呀媽先發現自己仲拎住我件冷衫。當我喊住咁罰企之際，突然見到呀媽拎住我件冷衫嚟咗學校。呢個畫面過咗廿年仲係歷歷在目。

佢幫我着咗件冷衫之後就走咗，而我都冇再喊，繼續罰企。」

子20年後為患癌母添衣

「廿年後，我26歲，而阿媽喺半年內因癌症而反覆入咗醫院幾次。有一朝，阿媽7點就打俾我：『阿仔，我好凍呀，你可唔可以早啲拎多件褸俾我？』

我個心好痛，因為喺呢兩個星期，我已經拎咗幾件褸去醫院俾佢，但佢虛弱到着哂都覺得凍。

嗰朝我拎住件褸去到醫院，求護士俾我早啲入去探佢。入到去，佢好攰咁坐喺床邊，見到我就微笑一下。我幫佢着咗件褸，洗面，餵佢食早餐。

我捉住佢隻凍冰冰嘅手，忍住眼淚同佢講『放心啦，我會努力承擔自己嘅人生，踏實咁生活落去。』佢冇出聲，只係擠出廿年如一嘅溫柔微笑。

而喺同一個晚上，我喺佢床邊，好似廿年前咁樣嚎哭。」

齊為事主打氣：巴打加油！

帖文引來大批留言，讚好數量更高逾1.5萬，不少網民睇到眼濕濕、好心噏，紛紛表示：「巴打保重」、「要努力生活比媽咪見到你開心」、「你媽咪可以喺走嗰陣時，可以喺充滿着你嘅愛同埋關懷嘅底下離去，我諗得佢來講已經係最大嘅福氣。」，而事主就回覆說：「再次多謝咁多位嘅鼓勵，雖然我而家仲係好難過，有啲頹，但我需要啲時間去move on，希望過多一排我就做到對呀媽嘅承諾。」

網民分享自身故事盼事主保重

同時亦有網民分享自己與母親的往事：「我好細個都經歷過，但我媽好tough，佢應該係放心唔落我同我哥，最後捱過化+電療先好返。喺度都希望祝有奇蹟出現」、「睇到流咗眼淚，因為小弟嘅母親係一手湊大我同啊哥。老豆仲要爛賭爛飲包二奶。所以仲有家人嘅你一定要珍惜。同時樓主一定要加油」、「舊年呢個時候都係我老豆走嘅日子，同佢大半生都狗咬狗骨，到佢開始有老人癡呆症就明白，老豆係我將來嘅寫照，所以同佢享受人生，同佢清潔、推住輪椅冒著風雨去酒樓飲茶，有時去老人院陪下佢，好多時都好掛住佢，加油呀！」

（全文完）

推薦閱讀：

移民｜以移民為條件拍拖　港女IG呻男友臨出發反口　網民撐分手：一開始就呃緊你！

《聲生不息》炎明熹衣錦還鄉與家人相擁而泣　母見獎座爆喊：我知道特別特別不容易

😊 為生活增值 Like 👉有線生活FB
💪 睇健康貼士 Like 👉有線健康FB
🔔 接收最新生活資訊 follow 👉 有線生活IG @icable.life