#車位
- JL
- 2023年01月31日
一線搜查｜ 中年漢人肉霸咪錶車位：你兜多個圈啦！ 私家車司機高EQ回應獲讚
香港地少車多，泊車車位一向供不應求，經常出現「有車無位泊」的情況。日前又再出現「人肉霸位」事件，網上流傳一段影片指，一名中年男子站在咪錶車位「人肉霸位」，拒絕讓私家車駛入，引起司機不滿理論，惟該男子仍拒絕離開，更表示「我架車喺後面」，要求司機「兜多個圈」。不少網民直斥該男子厚顏無恥，並且建議司機報警處理。 一名網民在Facebook群組「車cam L（香港群組）」上載一段影片，留言指「呢啲叫人肉霸位呀，你咁樣係唔啱㗎叔叔！」從片中可見，涉事地點疑為屯門黃金泳灘附近停車場，一名身穿藍灰色外套的中年男子站在咪錶車位，片中司機正與他理論，「人肉霸位啊叔叔你依家！係咪？你架車都未到，你明唔明啊？你話架車到咗，咁我泊咁我唔啱啦。」 男子：我架車就喺後面！ 該名中年男子則表示其車輛在後方，要求司機「兜多個圈」，「你…你…你兜多個圈啦，我架車就喺後面嚟，點樣嚟唔到啫？」司機不解：「點解我要兜多個圈啊？」男子續指，「架車喺度等就得，我個人喺到等唔得？」司機指出該男子做法不對，「個個喺度等緊㗎嘛叔叔，你明唔明啊？你唔啱啊叔叔」、「你架車都無到，你話喺後面塞緊，個個都喺後面塞緊㗎啦，你明唔明啊？你霸住個位唔啱㗎叔叔。」 男子否認人肉霸位：呢個位我㗎啦嘛 男子未有理會，更要求司機「行前少少」，「你行前少少啦，我架車已經到緊啦」，司機再次反問：「第幾架？邊架？喺邊度啊？你人肉霸位喎。」男子否認自己「人肉霸位」，並且反斥司機「塞住個位」，「依家咁多人喺度等緊，而家你架車喺嗰度，調返轉頭嚟塞住個位」，更強調此車位屬於他本人，「頭先個阿哥已經話畀我，畀我呢個位我㗎啦嘛，你而家仲喺度塞住架車」、「咁我係咪有權可以咁做啊？」 司機隨後將車輛駛前，惟該男子仍然未有離開，於是再次詢問男子車輛的去向，「你架車都未到，喺邊度呀？」而男子則大聲重複「咪喺後面囉，就喺你後面咋嘛」，影片至此結束。 網民：真係可以無賴到咁 不少網民直斥該男子「人肉霸位」行為十分無恥，、「人無恥，便無敵」、「咁大個人都唔覺得肉酸」、「強詞奪理，無得救了，這個是車位，不是人位，明白嗎」。亦有網民大讚片主有EQ高、有耐性，建議遇上「人肉霸位」情況，直接報警處理。 根據《簡易程序治罪條例》4A條，任何人無合法權限或解釋而陳列或留下，或導致陳列或留下任何物品或東西，而這些物品或東西對在公眾地方的人或車輛造成阻礙、不便或危害者，或可能對在公眾地方的人或車輛造成阻礙、不便或危害者，可處罰款5,000港元或監禁3個月。 （全文完） 免費電視77台《一線搜查》 播出日期：逢星期一至五 播出時間：20:00-20:30 WhatsApp報料熱線：68960931 節目重溫請＜按此＞
- JL
- 2022年10月13日
一線搜查丨屯門男童疑幫父母霸車位 人肉擋車險遭撞倒
香港地少人多又車多，泊車車位一向供不應求，經常出現「有車無位泊」的情況。日前，屯門一個停車場就上演了一幕「人肉霸車位」。有網民上載車CAM片段，片中一名男童站在停車場泊車位內，出手阻擋正後退駛進車位的白色電動車，過程險象環生。 網上的車CAM片段顯示拍攝日期為上周五（7日），片中可見一名身穿泳衣、年約10歲左右的男童，站在停車場泊車位內，據指是「有家長放低小朋友幫手搵位」，期間有一輛白色電動車正倒車駛入該空置的泊車位，男童隨即伸手阻擋及觸碰車尾示意。 男童後來又用手指向另一方的車輛，疑告知司機，其父母正進入停車場，自己正站在車位等候父母駛至。司機雖然見到男童「人肉霸位」但未有停止倒車，男童亦未有退讓，影片到此結束，未知事件後續及發展。 影片引起網民迴響，不少人批評，「咁樣直接可以告父母疏忽照顧兒童架（㗎），點睇都未夠18歲，入硬咁濟（滯）」、「生仔真的需要考牌」、「呢啲情況算唔算犯法」、「容易車死個小朋友」、「唔通喺依個媽咪眼中，小朋友條命仔都唔夠320矜貴？」另外，亦有人認為司機當時不應繼續後泊，「小朋友父母固然有問題，但白色電動車明知後面有小朋友，仍繼續後泊車，唔見得有車品」、「落車叫佢走開好過撞埋去」、「其實架車頂住個位已經夠，唔使咁玩個小朋友，一個唔小心就GG啦。」 根據《簡易程序治罪條例》4A條，任何人無合法權限或解釋而陳列或留下，或導致陳列或留下任何物品或東西，而這些物品或東西對在公眾地方的人或車輛造成阻礙、不便或危害者，或可能對在公眾地方的人或車輛造成阻礙、不便或危害者，可處罰款5,000港元或監禁3個月。 （全文完） 免費電視77台《一線搜查》 播出日期：逢星期一至五 播出時間：20:00-20:30 WhatsApp報料熱線：68960931 節目重溫請＜按此＞
- 大C
- 2022年10月12日
一線搜查｜水泉澳邨車位抽籤改制 輕型貨車不可再抽私家車車位 司機：逼我哋泊街？
位於沙田的水泉澳邨車位向來供不應求，免費電視77台節目《一線搜查》報道指，停車場公司最近通知車主，明年起輕型貨車（客貨車、貨Van）不可再參與私家車位抽籤，改為抽數量極少的貨車車位。有輕型貨車司機形容此舉無疑是「將貨Van趕盡殺絕」。 貨車位只有29個 水泉澳邨有11,123個出租公屋單位，但私家車位只有361個，貨車位更只有29個。一直以來客貨車都與私家車一同抽籤車位，而貨車位則給5.5噸或以上的貨車抽籤。在水泉澳邨住了6年以上的輕型貨車司機Patrick表示，現時水泉澳邨約有100輛客貨車，「一家人都係靠我哋揸車搵食，都係希望放工後，安置好㗎車，可以返屋企食餐安樂飯，但依家佢一刀切，將我哋100部客貨Van撥落去跟貨車抽，但得29個位，試問點夠分配。」 房署解釋私家車申請大增 位於山坡上的水泉澳邨有如「孤島」，鄰近沒有其他屋苑或設施可供泊車，所以水泉澳邨一帶違泊問向來嚴重。對於停車場改變抽籤方法，房署回覆《一線搜查》表示，是由於最近私家車位申請大增。按既定政策，牌簿上登記為輕型貨車的車輛，只可以停泊在輕型貨車泊車位，一直以來房署因考慮到善用資源，才會酌情讓輕型貨車停泊在私家車位，但當私家車位供不應求，就會取消上述酌情安排。 「房署一句說話，就係太多私家車入紙，就抹殺晒所有呢一班揸貨Van搵食嘅人！」Patrick不認同房署的改制理由，認為未能考慮貨Van司機的需要，他說：「你叫啲司機可以做啲乜嘢，咪泊喺街度，一係賣車囉，轉行囉，甚至乎攞綜援咪算囉，唔好做啦！」 一直協助貨車司機的社區主任梁昊佳表示，水泉澳邨的車位安排決定太倉促，房署應更早通知車主，讓他們有時間去處理車位問題，他期望停車場至少撥出一成至一成半私家車位給貨van停泊，以應付需求。房署表示，已在多個屋苑增設約230個車位，房委會會在可行情況下，繼續按需求，設法在現有屋邨增設泊車位。 綠怡雅苑車位終身制？ 公共屋邨抽籤車位有爭拗，「一次性抽籤」同樣有人投訴不公平。家住房協綠怡雅苑的觀眾李小姐向《一線搜查》表示，不滿屋苑的車位分配制度，「好似終身制，我覺得非常唔公平！」原來屋苑自停車場落成啟用後只舉行過一次抽籤，可說「一試定終身」。 2020年入伙的綠怡雅苑有1020個單位，私家車車位得96個、電單車位10個。停車場啟用至今，一共只有15名候補申請人獲編配車位，現時私家車及電單車輪候名單，分別有143人及17人。有居民認為應每一、兩年舉行抽籤，但房協回覆表示，「一次性抽籤」目的在維持公平編配原則及減低為住戶帶來不便之間作出平衡，而整個抽籤過程公開透明，如修改機制或會對已經抽籤並獲編配車位的住戶造成影響，亦可能會引起相關持份者的申訴。 有關水泉澳邨及綠怡雅苑停車場車位爭拗的詳細內容，可於網上重溫《一線搜查》。 免費電視77台《一線搜查》 播出日期：逢星期一至五 播出時間：20:00-20:30 WhatsApp報料熱線：68960931 （全文完） 推薦閱讀